Microsoft ја објави поддршката за Linux десктоп и лаптоп компјутерите во Microsoft Defender for Endpoint, нивната безбедносна платформа за компании. Станува збор за јавна пробна верзија („public preview“), која според листата на новитети е додадена во септември.
Компанијата објаснува дека сè повеќе програмери користат Linux на своите компјутери, а тие станале примамлива цел за напаѓачите. Според Microsoft, ваквите машини имаат пристап до изворниот код, „CI/CD“ процесите и „облакот“, па напаѓачот со нив добива многу повеќе од еден лаптоп.
Defender на Linux десктоп ги носи истите можности како на серверите, вклучително антивирусна заштита, „EDR“ (откривање и одговор на закани), управување со пропусти, далечинско истражување и изолација на уредот од мрежата. Не постои посебен агент за десктоп, туку се користи истиот пакет и истите методи за инсталација како кај серверите, а системот сам препознава дали уредот е сервер или работна станица. Според документацијата, кога знаците не се доволно јасни, уредот автоматски се води како сервер.
Поддржани се истите дистрибуции како кај серверите, меѓу кои Red Hat Enterprise Linux, Ubuntu LTS, Debian, Fedora, SUSE, Rocky Linux и Oracle Linux, без разлика дали работат со GNOME, KDE или друга графичка околина. Популарните десктоп дистрибуции како Linux Mint ги нема на листата, а Microsoft вели дека Defender може да работи на изведени дистрибуции, но тие не се дел од официјалната поддршка.
За Defender на Linux десктоп е потребна лиценца за Microsoft Defender for Endpoint Plan 2 или Microsoft 365 E5 и E7. Тоа значи дека станува збор за алатка за ИТ одделите во компаниите, а не за домашни корисници кои би сакале бесплатен антивирус на Linux, па во оваа смисла Defender и понатаму важи првенствено за Windows.
Вакво нешто сепак покажува колку Linux станал важен и за Microsoft, кој оваа година ја претстави Azure Linux 4.0, прва верзија од нивната дистрибуција наменета за општа употреба на сервери во Azure. Дополнително, на Linux неодамна стигнаа и десктоп апликациите на Claude и ChatGPT, токму алатки што ги користат програмерите.
Microsoft не соопшти кога поддршката ќе излезе од пробната фаза.
