Полека се ближи крајот на Windows 10, односно датата после која Microsoft веќе нема да пушта никакви надградби за системот. Таа дата е 14 октомври оваа година, по што корисниците реално ќе бидат во одреден ризик, а и недостиг на поддржани апликации.
Microsoft објави реклама во која токму овој дел го истакнува, односно ризикот кој корисниците би го имале дококлу останат на Windows 10. Рекламата е наречена „Вистинската страна од ризикот“, а интересно е што преку истата од компанијата промовираат само еден производител на чипови.
Во рекламата Microsoft ги истакнува предностите во купувањето на нов компјутер со Intel чип, а сега најчесто се промовираат чиповите кои имаат поддршка за Copilot+ компјутерите.
Не е познато зошто од компанијата не ги промовираат сите можности за корисниците, односно компјутери со чипови од Qualcomm, AMD и Intel, а посебно што на почетокот Qualcomm доби предност при промоцијата на Copilot+ компјутерите.
Без разлика на рекламата, се очекува дека голем дел од корисниците ќе продолжат да го користат Windows 10 уште одреден период, дел ќе се префрлат на Linux, а секако дел од корисниците ќе купат нови компјутери.
